hinduBrahmins

--------------------------------------------------------------------------------------------కుత్సుడు
కుత్స రాజర్షిని మాధుర్యానికి మరోపేరుగా పేర్కొంటారు. అది ఆయన ప్రత్యేకతగా చెప్పుకోవచ్చు. 

'కుత్సుడు' అంటే 'తప్పులెన్నువాడు' అని అర్థం. ఒక మహర్షికి ఇలాంటి అర్థమున్న పేరు చిత్రంగా అనిపిస్తుంది. అయితే, దీన్ని మనం 'వ్యక్తులలోని తప్పులు వెతికే వాడు' అనే అర్థంలో కాక, 'విశ్వంలోని తప్పులు వెతికి, సరిచేయ ప్రయత్నించేవాడు' అని అర్థంగా చెప్పుకోవాలి.

తెలుగులో 'కుత్సితం' అనే మాట ఉంది. దానికి అర్థం 'తప్పులు వెతికే వంకర బుద్ధి' అనుకోవచ్చు. ఈ మాట బహుశా 'కుత్సుడు'కు ఉన్న గుణంనుంచే పుట్టి ఉండవచ్చు. 

రుద్రంలోని 85 సూక్తాలలో 65వరకూ కుత్సమహాముని రాశారని అంటారు. 

పూజాదికాలలో మనం చేసే ప్రోక్షణ మంత్రాన్ని అత్రి, భృగు, కుత్స మునులు రాశారు. తైత్తరీయ సంహిత (2.6.5)లో ఇలా ఉంది:

'బ్రహ్మవాదినో వదంత్‌బృత్‌ హవీంషి ప్రోక్షి కేనాప ఇతి 
బ్రాహ్మణేతి బ్రూయాత్‌ అభ్యిర్థి ఏవ హవీంషి ప్రోక్ష ఇతి బ్రాహ్మణాప'  


ఋగ్వేదంలోని (1.106.6,7) మంత్రాలను కుత్సుడు రాసినా, అవి తన గురువైన ఆంగిరసుడితో కలిసిరాసినట్లుగా కుత్సుడు పేర్కొన్నట్లు చెప్తారు.

మహాకవి కాళిదాసు తన 'రఘువంశ' కావ్యంలో పంచమాధ్యాయాన్ని (5వ అధ్యాయం) కుత్సునికి ప్రార్థనతో ప్రారంభిస్తాడు. రఘువంశ కీర్తిప్రతిష్ఠలకు కుత్సుడి దీవెనలే కారణమని ఆ ప్రార్థనలో కాళిదాసు వివరిస్తాడు. 

కుత్సుడు ఇంద్రునికి మంచి స్నేహితుడు. ఇద్దరూ ఆకారంలో ఒకే పోలికలతో ఉంటారనేది మరో విశేషం. తమ స్నేహం కారణంగా, కుత్సుడు, ఇంద్రుడిని,

తన తండ్రి అయిన రురు శత్రువులను నాశనం చేయమని కోరతాడు. ఫలితంగా ఇంద్రుడు రురు శత్రువులను నాశనం చేస్తాడు. ఈ విజయాన్ని పురస్కరించుకుని, కుత్సుడు దేవలోకానికి వెడతాడు. అక్కడ ఇంద్రుని సతీమణి ఇంద్రాణి, ఆ ఇద్దరిలో తన భర్త ఎవరో గుర్తించలేకపోయి, తనకు సహాయం చేయమని వారినే అడుగుతుంది. ఆ విధంగా ఇంద్రాణి, కుత్సుడి పోలికలతో ఉన్న తన భర్తను గుర్తించగలిగిందని ఋగ్వేదంలోని 4-16-10వ ఋక్కు వివరిస్తోంది.

కుత్సుడి గురించి తమిళ వాజ్ఞయంలోనే కొన్ని ఐతిహ్యాలు ఉన్నాయి. వాటిలో ఒకటి: కుత్సుడు ఒకసారి వేదపఠనంలో ఒకసారి ఒక తప్పు చేస్తాడు.

ఆ కారణంగా కుత్సుడు ఒక కప్పగా 'శరవణ పోగై' అనే సరస్సులో జన్మిస్తాడు. ఈ దివ్యక్షేత్రానికి సుబ్రహ్మణ్యస్వామి విచ్చేసినప్పుడే, కుత్సునికి శాపవిమోచనం కలుగుతుంది. తనకు కలిగిన దురదృష్టానికి చింతిస్తూ, కప్పరూపంలో ఉన్న కుత్సుడు, వాల్మీకి క్షేత్రంలో 48 రోజులు సౌందరరాజ పెరుమాళ్‌ను పూజిస్తాడు. అప్పుడు తారకాసుర సంహారానికి సంకల్పించిన సుబ్రహ్మణ్య స్వామి ఆ పని పూర్తిచేసి, వాల్మీకి క్షేత్రానికి వస్తాడు.

అప్పుడు కప్ప ఆకారంలో ఉన్న కుత్సుడికి శాపవిమోచనం అవుతుంది. అందుకే, ఆ పుష్కరిణికి 'మండూక పుష్కరిణి' అన్న పేరు వచ్చింది.

ఇది వాల్మీకి జన్మస్థలమైన 'అంబిల్‌' అంటారు. అందుకే, ఈ దివ్య క్షేత్రాన్ని 'వాల్మీకి క్షేత్ర'మంటారని శ్రీరంగ దేవస్థానం వారు ప్రచురించిన

'తిరువరంగం తిరుక్కోయిల్‌' అనే పుస్తకం (క్షేత్ర మహాత్మ్యం)లో ఉంది (పేజీ 73-74). ఈ 'అంబిల్‌' క్షేత్రం 108 శ్రీవైష్ణవ దివ్యదేశాలలో ఒకటిగా పేరు పొందింది. 



                                                 *       *       *       *       *

-----------------------------------------------------------

Copyright Reserved